اعمليلي ذكرياتي

صحيت من نومي
مضحوك عليا
مضحوك علينا
جيلنا ضايع من إيدينا
والمعني في بطن واحد
الشعر جاله بالقرابة
أصله كان يقرب لشاعر
أصل مش سهلة الكتابة
إلا في جرايد بلدنا
فيها الكتوبة بسهولة الخلفة
يعني تقراها و انت طافي النور

صحيت من النوم
مضحوك عليا
الجزيرة مش مفترية
والمستقبل ملوش انطلاقات
لا قديمة ولا جديدة
نص الشعب عالحديدة
قالو الأماني مش بعيدة
والحياة هي الدراسة
بس ذاكر
في المذاكرة والتعب طلعت شاطر
بس شاطر بغبغان


قالو حرام الولد والبنت
وان ده مش شئ جميل
لكن لقيت جوايا حضنك
هو أحلي ما في حياتي
اعمليلي ذكرياتي
فجري بركان مشاعر
بس اوعي تطلعي
قريبة الشاعر